《職業特工隊：叛逆之謎》影評：年年廿五湯校長，動作片大師

一提起”型佬湯” 湯告魯斯，相信大家腦海中都會即刻聯想起職業特工隊 Mission Impossible。MI 同湯告魯斯已經成為咗彼此的代名詞。每一幕奮不顧身唔用替身嘅驚險場面，甚至一年前拍攝今集MI6 時傳出湯告魯斯在拍攝期間受傷的新聞，都令小編對於今集相當期待。上星期職業特工隊6 在香港正式上映，小編終於有機會入場觀賞Ethan Hunt 嘅英姿，果然睇完全場147分鐘，完全冇令我失望。

銀幕上嘅湯佬，明顯比起21年前Mission Impossible 第一集嘅”靚仔湯” 成熟唔少，不過小編問過身邊的女同事，佢哋都覺得Tom Cruise 就好似Chilam 咁，食咗不老魔藥，仲係一樣迷倒眾多女粉絲。今集陣容絕對可以稱得上相當強大，有睇開荷里活電影的觀眾，相信唔難發現，電影裡面的奸角 Walker 就係留咗鬚嘅超人 (Henry Cavill 飾)，美女黑幫頭目就係英劇The Crown 的瑪嘉烈公主(Vanessa Kirby飾)，FBI 一姐Sloane 就係黑豹裡面的母后(Angela Bassett飾)，女主角Ilsa Faust就是在大娛樂家飾演女歌手嘅瑞典女星Rebecca Ferguson。陣容如此鼎盛，但係瞬間都被湯佬唔用替身嘅搏命演出蓋過。

故事一開始就以一場不算太刺激的槍戰，來把觀眾慢慢帶入局。其後任務正式開始，一幕不用替身的高空跳傘，總算展開了Mission Impossible 的一貫套路。在俱樂部廁所裡一場二打一近身戰，湯佬與Walker肉搏華裔演員，相比起利用飛車或飛機的大型特效製作，仍然毫不遜色，拳拳到肉，好睇！

入場睇職業特工隊，當然唔少得鬧市飛車和預告片裡面相當搶眼的直升機混戰，其中湯佬在巴黎鬧市中騎電單車擺脫警察追捕一幕，相信型爆程度已經令不少女粉絲昏迷！直到劇情尾段需要爭分奪秒，湯佬駕駛直升機追捕壞人，以及其他同伴幫忙拆解核彈，刺激和緊張程度與上集比起來有過之無不及，全長147分鐘，絕無冷場。

最後值得一提的，是湯告魯斯在拍攝倫敦一場關禮傑式跳天台時不慎受傷，令電影停拍，雖然如此，湯告魯斯還是盡快令自己復原，補拍之後的天台飛奔一幕，年過半百的他，意志和毅力絕對不容小覷。即使不是職業特工隊的粉絲，小編也真心推介大家入場支持。