《兄弟班》影評：溫拿樂隊自傳電影

溫拿樂隊，一個陪伴著香港人成長嘅回憶。溫拿五虎，由二十幾歲唱到六七十歲，一首又一首經典歌曲，絕對係家傳戶曉耳熟能詳。
正值溫拿樂隊出到45週年之際，溫拿五虎之一嘅陳友執起導演筒，將溫拿樂隊當年甘苦與共的故事搬上銀幕。

故事講述七十年代一班年輕人，受到當時西方搖滾音樂的影響，夾band jam歌，可是並不受家長理解，覺得這是不設實際的玩意，百般阻撓。一行五人，最初夾band 純粹為興趣，因緣際會參加了一場搖滾音樂比賽，報名時所有報名表已經派晒，只得一張跌喺地下，隊名寫住Loosers，五個人於是就以Loosers 為隊名，想不到竟然初試啼聲，獲得了一點人氣。後來Loosers 被唱片公司睇中，改名Wynners，於是便成為大家耳熟能詳嘅溫拿樂隊，一炮而紅。
雖然溫拿紅起來，但是大眾焦點往往集中在兩位主音，譚詠麟和鍾鎮濤身上，忽視了另外三位樂手。

這次電影 “兄弟班”，雖然以溫拿樂隊為背景，但是主角陳家樂，並不是飾演譚校長或者B哥哥，而是OK仔彭健新，用OK仔的角度，講述一個真心愛音樂，真心愛兄弟，在溫拿45年鎂光燈下經歷過的種種故事。本電影雖然不是高成本製作，但是也是原原本本採用真人真事取材，當中不少情節，包括彭健新被父親用鐵鏈鎖住不準打band 也是真實發生過。兄弟間，也會因為名利，因為誤會而爭執，甚至反面，但是最後彼此重修就好，才是溫拿樂隊咁多年來最難能可貴之處。

電影五虎除了陳家樂外，還起用唔少新晉演員，例如林耀聲、鄧加樂、吳鶴謙及于湉。另外也有不少實力派演員，例如任達華、惠英紅、廖啟智、金燕玲等等。
電影最後，除了播出溫拿樂隊首本名曲《千載不變》之外，當然唔少得溫拿五虎真人出鏡，見證住45年來溫拿樂隊陪伴香港人成長嘅所有點滴。