仲睇復仇者？《死侍2》仲過癮！

萬眾矚目嘅Marvel大作《復仇者聯盟3》雖然一度攻佔各項開畫票房紀錄，但係上映幾個禮拜之後，後勁已經開始逐漸顯得無力。其中一個非常重要的因素，就是另一部Marvel電影《死侍2》緊接著復仇者上映，為復仇者3有望挑戰史上最高票房紀錄的一大難關！

如果《復仇者3》係一部籌備10年，群星如雲的史詩式大作，咁樣《死侍2》絕對係一部無心插柳嘅幽默另類超級英雄電影。相信觀眾入場睇死侍唔會係因為想睇電影有咩引人入勝的特技，或者感人肺腑的劇情，入得場嘅觀眾，只會睇一個人，佢就係死侍嘅化身，或者死侍就係佢嘅化身：Ryan Reynolds。

台灣會形容死侍 (或者Ryan Reynolds 本人) 係嘴炮王，小編諗唔到一個比較貼切嘅廣東話名詞，姑且就叫佢做「水怪」。值得一提嘅係，死侍呢個角色同其他超級英雄角色最大嘅分別 (不論係漫畫裡面抑或係電影)，Deadpool 係知道自己嘅角色喺電影/漫畫裡面，所以可以打破第四面牆直接同觀眾講野。死侍2裡面好多搞鬼對白，甚至包括電影宣傳片 (同碧咸講sorry，同曼聯唔知做乜)，都充滿好多「梗」(又係台灣用語，真係唔知廣東話要點講)。觀眾可能需要對某些電影或者Ryan Reynolds 本身嘅過去 (例如拍DC 綠燈俠嘅黑歷史) 要有一定嘅認識，先會睇得明啲對白講乜。

除咗Ryan Reynolds 之外，死侍2仲有兩個角色值得留意，其中一個就係「大魔王」Cable (Josh Brolin 飾)，不過Cable 並唔係徹頭徹尾嘅大奸角，佢甚至一啲都唔奸，最尾仲同死侍合作，共同阻止真正嘅大魔王。觀眾可能睇完都冇留意，飾演Cable嘅Josh Brolin 其實就係復仇者3 裡面嘅Thanos，所以有一句對白Deadpool 直接稱呼Cable 做Thanos 就係咁嘅意思。睇嚟Josh Brolin 相當適合飾演呢啲「衰唔晒」嘅奸角。

另一個值得留意嘅演員，就係飾演Domino嘅Zazie Beetz，佢喺電影裡面被死侍叫做 Black Black Widow， 佢嘅超能力設定相當搞笑，就係「好運」。意思就係佢可以改變事情發生嘅機會率，令到佢可以將即將發生嘅時間，變得對佢有利。其實Deadpool 仲有其他同伴，包括客串隱形俠嘅畢彼特，觀眾可以慢慢發掘下其他電影彩蛋，***仲有，千祈唔好唔記得留到最後睇片尾嘅勁爆彩蛋！